ازيكوا يا احلى اعضاء النهارده انا عيزه اكلمكوا فى قضيه لازم نناقشها سوا وهى حينا لمصر عمرك سالت نفسك ليه بتحب مصر ده سؤال عمرك ماهتلاقيله اجابه تعلوا نتكلم عن الموضوع ده بواقعهاكلمك عن مصر؟؟؟
انا ياما اتكلمت عن مصر اصلا... فى كل وقت و فى كل مكان ده انا طلعت عين اللى جابونى الاول انا احتريت قبل ما اكتب الموضوع ده اكتبه باسلوب ساخر متهكم ولا اكتبه بشكل ابن ناس ؟ نظام مصر هى امى و اللى يجيب سيره امى الى اخر هذا الهراء
انا عمرى ما سالت نفسى ولا هسالها انا ليه بحبها انا عمرى ما عرفت انا بحبها ولا لا بس كانت فيه حاجات بتحصل لى مكنتش عارف افسرها بس متهيالى بتصب فى نفس الموضوع انا كنت بسال نفسى ليه كنت بتنطط لما الحضرى شال بنلتى ولا اتنين من بنلتات كوت ديفوار فى كاس الامم 2006 ؟ ولما كنت فى ماتش السنغال فى 2006 و شغلوا اغنيه شاديه بتاعت يا حبيبتى يا مصر بقيت بلوح بالعلم بحماس منقطع النظير
ايه يا عم مالك؟
ايه الكهربا اللى فى اطرافك دى ؟ ايه دقات القلب العنيفه دى ؟ وليه لما كنت بسمع فى الطياره نداء الطيار بان الطياره دخلت الاجواء المصريه... كنت بروح الزق وشى فى الشباك و اتفرج عليها من فوق كنت بشوف تناسق معمارى فاشل و مساحات خضراء نادره تقريبا كنت بشوف ستاد القاهره بارضيته و نجيلته الفاشله كنت بشوف كل حاجه من فوق سخيفه مفيش ادنى لمسه جماليه او تناسق شكلى يذكر حتى بس انا من جوايه مبسوطه مبسوطه اوىىىىى ! عمال الزق وشى اكتر و اكتر فى الزجاج البارد و اقول لاختى مصر اهيه !ويبقى ناقص اقول احضنها .
ثوانى كده بس
مصر اهيه ايوه يا سيدىمصر اهيه مصر بخيرها اللى مش فى ايد ولادها ومصر اللى الفساد فيها على كل شكل و لون مصر المحسوبيه و السبوبه و الفهلوه مصر الفوضى و الهرتله.
مصر بلد الهلس البلد الوحيده اللى لما تيجى تعلن عن ازدهارها للسياحه على ارضها تجيب فى الاعلان رقاصه و هى نفسها بلد الفرص الغير موجوده الفرص المعدومه مصر الضياع والاحلام المكبوته الحلم الاخضر اللى مطالش يكبر
مش قصدى اشرد والله!!!
نشرت الغسيل الزباله حضرتك ؟شردت بلدك ؟شردت بلدى؟ ده انا بحبها اوى والله بحبها و قلبى بيدق لها بحب اكون موجوده بحب المس سور كبرى قصر النيل الفجر او بليل حتى و هو متلج بحب اتجمد و اتامل النيل قدامى ابص على المساحات الزرقاء اللى قدامى ابقى باصه لحياتى و همومى و احزانى واحلامى
ابقى شايفه الدنيا ادامى بتمر زى شريط السنيما احس بدفء رهيب جوايا دفء عامل زى دفء السبرتايه و صسوت ام كلثوم طالع من اقرب راديو ولا صوت عبد الحليم انا مبحبش صوت ام كلثوم بس كانها لوحه مش هاتكمل غير بصوت ام كلثوم
فى اسكندريه الشتا جنه و الموج فى بحرها بيتغنى !!
مصر حيث تاخد اول عربيه على اسكندريه وبرضو فى عز الشتا وتقف على الكورنيش الفجر قدام فندق كيلوبترا تتجمد تحس انك بتطلع تلج من بقك مش بخار بس انت بتخسل نفسك بتغسل همومك و حياتك بترجع انسان تانى نظيف نضافه الاطفال بتبتدى من جديد.
بحب العيد و صلاه العيد فى زحمه المساجد و السنيما اللى كلها ناس منكدسه علشان تدخل فيلم السقا الجديد .....
عرفتوا مصر دلوقتى مصر فيها الحلو و فيها الوحش بس الاحسن نبص للحلو و نبعد عن الوحش علشان نشوفها دايما احلى و اجمل و اروع بلد فى العالم
مصريه وافتخر
s.team jacob
