ازيكم يا اعضاء ... ايه اخباركم ؟؟؟؟
طبعا مفتقدينى
المفأجات عشان متحتروش هتكون عبارة عن مجموعة مقالات من كتابتى الخاصة هيكون اسمها( مقالات قد تهز الرأى العام ) وهنزلها على اجزاء ان شاء الله واحاول ارصد من خلالها بعض المشاكل والظواهر الغريبة عننا والنهارده اول جزء منها ( هو فيه كده )
واليكم المقال الاول
بما انى قررت انى ارصد بعض الظواهر الغريبة فى مجتمعنا من خلال هذه المقالات فكان من الطبيعي انى ابدأ بأغرب واوضح واهم ظاهرة فى شارعنا اليوم .....
شبابنا
لو نظرنا الى الشباب اليومين دول نظرة جادة غير متحيزة هنشوفهم ازاى ؟؟؟؟؟تخيلوا معايا شكل الشاب دلوقتي .... رايح كليته لابس بنطلون مقطع ساقط بشكل غريب و15 حظاظة فى ايديه والسلسلة فى رقبته وعامل شعرة زى اتش دبور ( لاننا طبعا اليومين دول بنحب نقلد اى حاجة واحنا مغمضين عنينا فيقوم الشاب من دول عامل شعرة زى دبور وحاطط الجيل وده طبعا عشان يبقي الواد الروش ) المهم نرجع للوصف ... ويبقي الواحد منهم رايح راكب ال bmw ويروح لصحابه ... هيقولهم ايه ؟؟؟؟ .... هاى يا شباب عاملين ايه يا رب تكونوا بيس !!!!! فيقولوله ايه يا مان ازيك مبتظهرش ليه !!!!! وكأن السلام عليكم ورحمة الله انقرضت او مثلا مينفعش يقولوها لبعض ... طيب وبعدين هيحضر محاضراته ؟؟؟؟ لا طبعا .... هيقولوله صحابه يلا يا معلم نروح نفطر ونعيش شويه ... يركبوا ال bmw ويشغلوا الاغنية التمام ( انجليزى طبعا ولا هما فاهمين منها حاجة بس روشنة ويعلوه على اخره بحيس انهم يخرجوا من العربية ميسمعوش تانى بعد كده ) ويا سلام لو فى شارع فاضى يبقي يوم مش معدى هيقفل العداد و طبعا روشنه ومفيش لا كلية ولا تعليم ولا اى حاجة ويقولك يا عم ده كلام ملوش لازمة انا هعمل ايه بالتعليم يعنى الغنى منهم هيقولك انا باباى معاه فلوس كتير وانا اشتغل ليه ؟؟ والفقير منهم هيقولك وانا اصلا اذا اتخرجت مش هلاقى شغل !!!!!!!!!!!
نيجي للبنات بقي .... تخيلوا معايا البنت .... نازلة رايحة الكلية برضه لابسة كذمة غريبة جدا ومسمياها كذمة على الموضة بقي وبنطلون ضيق جدا وساقط بشكل بشع وبدى ضيق جدااااا وقصير جداااا برضه و2 كيلو بودرة على وشها واحمر اوى وتقولك ده طبيعي ( حمار ربانى ) وبعد ده كله تلاقيها لفة رأسها هدية ( قال محجبة ) تلاقيها طول الوقت بتحاول تتكلم كلمتين انجيلزى هى مش عارفة معناهم بس حافظاهم كده وده طبعا عشان تبان ستايل ... وتقف مع اصحابها وصوت الضحك يوصل اخر الدنيا واصطناع الرقة ( طبعا فيه ناس رقيقة بس بيبقي فيه رقة مستفزة ومصطنعة ودى بتبقي واضحة جدا ).
ده نموذج لولد وبنت موجودين بينا طول الوقت وكان هدفى من التشخيص ده انى اقول ان شباننا دلوقتى مبقاش شباب زمان ( ممكن تقولولى احنا زمنا غير زمن الناس فى الماضي لكن هقولكم ان العادات والتقاليد بتاعتنا مينفعش تتجزأ ولا يمحيها الزمن ) والهدف الرئيسي اللى عايزة اوصله .......
هو فعلا الرجالة ماتوا فى الحرب ؟؟؟؟؟!!!!!!
انت دلوقتى تقدر تحارب يعنى تخيل لو قالولك اننا قررنا نحارب بكره هتعمل ايه طبعا معظمكم هيقول طبعا هحارب وادافع عن بلدى واموت فده الوطن والكلام الجميل ده كله .
طيب خلينى اجرب معاك ...
تخيل انك قاعد دلوقتى على الكمبيوتر ونادوا عليك قالولك ابن خالك بيتخانق تحت فى الشارع هتعمل ايه ... هتقولى هجرى انزل طبعا واتخانق عشانه ... انا معاك .
طيب لو قالولك ان فيه خمسة معاهم مسدسات وموتوا خمسة وبيضربوا نار بعشوائية ... ها ... هتنزل ؟؟؟؟ .... معتقدش .
هل شباب النت وال mp 3 و ال face book يعرفوا يحاربوا ؟؟؟؟.... يعرفوا يعرضوا حياتهم للخطر ؟؟؟؟... ( ممكن يكون فيهم ناس تقدر تعمل ده لكن الغالبية العظمى ؟؟؟؟؟ )
طيب البنات لو فيه حرب هتعملوا ايه هتقولوا طبعا احنا بنات وما باليد حيلة هنعمل ايه يعنى ؟؟؟؟!!!
كولد الرجولة فى نظرك شكلها عامل ازاى ؟؟؟؟
كمثال مثلا وانت فى البيت ترمى حاجاتك هنا وهناك و تقلب اوضتك وطبعا مامتك او اختك هما اللى مفروض يرتبوا الحاجات دى تانى على اساس انك راجل !!!! صح ولا لا ؟؟؟ بتقول كده ولا لا ؟؟؟؟
شايف ان ده الصح مع انك اذا رتبت انت حاجتك وساعدت امك هيكون هو ده اسمى معانى الرجولة ......
احنا جيل غريب ... قولولى ايه اكبر مشاكلنا دلوقتى ... عمرو وتيمو !!!!
دى ممكن تكون هوايات حلوة اوى لكن تكون محور الحياة هى دى الكارثة ....
كلامنا دلوقتى اتسسلت ليه الفاظ غريبة جدااا لا هى عربي ولا اى لغة تانية ... يعنى ايه مثلا ... فاكس !!!!!! يعنى ايه اخر حاجة !!!!
حتى طريقتنا مع بعض فى الحوار والكلام بقت غريبة ... الكلمات العربية الراقية مبقتش موجودة فى حوارنا ...
والكتابة طبعا مقولكوش ... ولا كأننا عدينا على مدارس فى حياتنا كلها !!!! الكتابة كلها تقريبا غلطات املائية ... كلامات بسيطة اوى لكن بتتكتب غلط ( مع ان انا فاكرة ان كان عندنا حصة املاء واحنا فى ابتدائى ) !!!!! ده غير ان الكلمات العربي بقت تتكتب بحروف انجليزى والعكس صحيح !!!!
وفى النهاية احب اقول انى لا اقصد اى اساءة لاى شخص من كلامى .
واليكم حق الرد .......
سلمى سليم
عدل سابقا من قبل slmah sleem في الخميس نوفمبر 18, 2010 3:41 pm عدل 1 مرات
بس انا يظهر جيت متأخر ولا اييييييييييه