الله عليك يا جخ ((ايوة بغير))

ايوة بغير...

لا انا نقصان ولا ضعفان ولا مسطول ولا سكران ولا زايغ من عيني الضي

ولا حد احسن مني في شي

بس بغير...........

واللي قالولك غيرة الراجل قله ثقه او قله فهم

خلق حمير........

غيرة الراجل نار في مراجل

نار بتنور مابتحرقش

واحنا صعايده ما بنستحملش

شمسنا حاميه وعرقنا حامي وطبعنا حامي

واللي تخلي صعيدي يحبها يبقى يا غلبها

اصلنا ناس على قد الطيبه كلنا هيبه

والستات في بلادنا جواهر

طب لو عندك حته ماس

هتخليها مداس للناس

ولا هتقفلي اوضه عليها بميت ........ ترباس

يمكن حتى تأجري ليها جوزين حراس

يبقى انا لا انا غافل ولا جاهل

كل الفرق ما بيني وبينك اني صعيدي

الله يخرب اليوم اللكحل اللي لا ليه اخر ولا اول اللي طلعت لقيتني صعيدي

لو كان بأيدي

كنت اعملك هندي بريش

واقلب شعري كنيش كرابيش

والبسلك سلسله مدلدله خرزة وقلب

بس ازاي البسلك سلسله

هو انا كلب ؟؟؟؟؟

ثم العبرة ماهيش باللبس

اصل المشكله مش في اللبس

اصل المشكله عندك عندك

اصل المشكله عندك عندك

قولت هسيبها وبكرة تحس

بعده تحس

بعده تحس

ده انا لو جبس كنت زعقت

ماشي صداقه وماشي زماله

بس ا جتش على الرجاله

ما ستات الدنيا كتير

وانا ما بقولش تخاصمي الناس

ولا تتحجبي عن الرجاله

ولا تعتكفي وتسكني دير

بس ياريت حبه تقدير

اني بحبك

واني بريدك

واني زرعت حياتي في ايدك

واني غزلت بنات الدنيا عقود على جيدك

وانتي تعبت من التفكير واني بغييييييييير



((( هشام الجخ )))