بسم الله الرحمن الرحيم
السلام عليكم ورحمة الله وبركاته
أولاً: أقوى قصة حب في مصر
نحن نعشق الفساد ... ايوة ما تستغربش قوي كده وعينيك تتفتح عن اخرها ... احنا بنحب الفساد , احنا بنموت في الفساد , مُتَيْمين بالجهل والظلام , ولو مش مصدق قولي انتا لما بتكون في محطة مترو من المحطات المحدوفة يا ترى بتعدي من المكنة ولا بتنط من عليها , يا ترى بترمي الزبالة في الشارع او المقلب المتفقين عندكو في حتتكو على مكانه ولا بترمي الزبالة في صندوق المهملات ولو مش موجود بتحاول تجيب صندوق للمهملات عن طريق مجلس الحي او قسم الشرطة او نقطة البوليس اللي عندكو في الحتة , يا ترى روحت تعمل بطاقة انتخابية ولا الحكومة فاسدة وخلاص .. ولو عندك بطاقة انتخابية هتدي صوتك لاختيارك ولا للي هيدفع اكتر وخاصة ان الصوت دلوقتي وصل 800 جنيه دا غير الهدايا والذي منه , يا ترى وانتا بتتفرج على المتش واللاعب بيضيع فرصة خطيرة بتقول ياااااااااااه ... إن شاء الله تتعوض ولا بتشتم اللاعب بالام والاب والدين كمان .... ومليون حاجة وحاجة وعلى اختلاف المستوى الاجتماعي بتاعك ومن كل الالوان والاشكال بتكون انتا واحد من اتنين: يا راشي يا مرتشي , يا جاهل يا مُجَهِّل , يا فاسد يا مُفْسِد ... دا غير بقى المعلمين اللي بيكونو فاسدين ومفسدين في نفس الوقت ... اقسملك بالله ان ساعات بتيجي عليا لحظات اقول فيها اننا لا نستحق ان نكون مصريين .. هذه الدولة العظيمة التي ذكرها الخالق عز وجل في كتابه العزيز لا تستحق ابداً ان نكون نحن ابناءها .. مش ممكن دولة زي دي ولادها يسمعو الحمار والحنطور والعنب , مش ممكن دولة زي دي ولادها يشربو قرش الحشيش بتلاتين جنيه بس , مش ممكن دولة زي دي ولادها يكون عندهم امية 43% وفقر 68% .. يا جدعان والله ما ينفع , صدقني لو كنا دولة مرمية على الخريطة كده في اخر الدنيا كنت قولتلك ماشي بس ما ينفعش ... احنا سواء شئنا ام ابينا احنا دولة عظمى , وكل البحوث الاستراتيجية اثبتت ان موقع مصر الطبيعي هو ان تكون الدولة الرابعة على العالم بعد امريكا الاول والمانيا التاني والصين التالت بما تمتلكه من كفاءات بشرية وقوة عسكرية وثقل تاريخي وموقع جغرافي شديد الاهمية ومكانة مركزية ضخمة سواء على المستوى العربي او الاسلامي او الافريقي ... يبقى احنا لازم نكون عارفين - وحالة الوطن متهورة كده - اننا ولا نستاهل نعيش من اصله تحت راية هذا الوطن العظيم.
ثانياً: عار الاستادات
ناس كتير قوي بقت بتدايق من البنات اللي بيروحو يتفرجو على الماتشات من الاستاد .. طيب بدل ما تزعل من البنت اللي رايحة تتفرج على ماتش وده من حقها غصب عن اكبر شنب , ازعل من اللي بيتحرشو بيها وده مش من حقهم غصب عن اكبر شنب ... انتا بالمنظر ده عامل زي اللي قتل واحد ومضايق من دمه اللي وسخ الكنبة والعفش ... ولكن في نفس الوقت انا فاهم شعورك وليه احنا وصلنا للمرحلة دي لدرجة ان البنت اصبحت في نظرنا كارثة وشوية شوية هنرجع لزمن الجاهلية ونوئدهم وندفنهم احياء وهما اطفال صغيرين عشان نخلص من مشاكلهم ... انا فاهم والله لإن مفيش جواز , مفيش حب , مفيش عاطفة , مفيش مشاعر , مفيش مفهوم صحيح عن العائلة , مفيش مفهوم صحيح عن التعامل مع الاخر , مفيش مفهوم بنت الحتة واللي هيا اختنا كلنا واللي يمسها ناكله بسنانا , مفيش شِعر , مفيش قصة , مفيش فن .... في حاجتين بس: النقاب او شارع الهرم ... وبالتالي كل ما هو موجود بين ذاك السندان وتلك المطرقة هو مطحون وتائه ومُشَوَّش.
ثالثاً: ممكن نوصل للحل
حسين ياسر المحمدي هو رمز شديد الوضوح لما يسمى بالضياع المصري ... من الاول خالص الراجل ده ابوه طلع من مصر لانه اصبح لا يستطيع ان يعيش فيها ... وبالتالي ابنه انتمى للوطن الحقيقي اللي رباه وعلمه وكبره ... ولإن مصر هي الدولة الوحيدة في التاريخ والعالم التي يبكي ابناءها وهم يخرجون منها , رجع ليها مرة تانية , وحاول انه ينجح في اول محاولة ولكن الظروف ما كنتش مساعداه بسبب الاصابات وشدة المنافسات الداخلية والخارجية , دا غير المنافسة القوية اللي جوا الفريق نفسه عشان كثرة النجوم ((ودي على فكرة كانت هيا المصيبة الاساسية في انخفاض مستوى الاهلي ... مستوى الاهلي دلوقتي احسن رغم النتائج الغير ايجابية لإن على الاقل انتا عندك لاعيبة بتدي 100% من مجهودها ويمكن 150% كمان عشان تثبت نفسها ... كترة النجوم اساسا بتعمل تخمة فنية عند المدرب وخاصة في اختياراته وتكتيكاته واكبر مثال على كده ريال مدريد ومانشستر يونايتد ... مدريد عنده 500 نجم واهو طلع من الدور 16 لدوري ابطال اوروبا وكمان بيترنح على قمة الدوري الاسباني , والمان عنده روني بس وشوف عمل ايه في الميلان وشوف قدر يتنزع الصدارة من تشيلسي ازاي في الدوري الانجليزي)) .... ولكن لما اتحط حسين ياسر في ظروف كويسة ابدع واهو بيقدم مستوى رائع وربنا يوفقه.
رابعاً: موقف مصر الحالي
بالنسبة لحكاية الكبار في المونديال , اه هما الكبار .... كأس العالم هو أقوى مناسبة كروية ويكاد ان يكون اقوى مناسبة رياضية لانه بدأت كرة القدم تطغى بقوة على باقي الالعاب والدليل على ذلك وصول اسعار اللاعبين الى ما يساوي ميزانيات دول باكملها ... كاس العالم يعني الدنيا كلها هتشوفك وتعرفك , كاس العالم يعني خروج من المحلية الى العالمية , كاس العالم يعني منافسة كبار المدارس الكروية ... ولو كاس العالم مش مهم ماكنش بقى مجرد الوصول ليه يساوي 5 ملايين دولار وما كنش بقى هوا حلم التمانين مليون وما كنش حصلت الكارثة دي كلها مع بلد المليون ونصف المليون شهيد ... هما بيلعبو الكرة الحديثة , واحنا لسه بنفكر اذا كانت 4-4-2 احسن ولا 3-5-2 احسن ... هما عندهم محترفين مالهومش عدد واحنا بنعمل فرح على محترف واحد ولا اتنين وبنبوس ايديهم ونقطع في مدرب بلدنا الاسطوري بالسكاكين عشان خاطر يكونو في المنتخب حتى ولو اصبح مستواهم ضعيف جداً وحتى ولو كانت اخلاقهم ضحلة وتفكيرهم اناني وما يهمهومش الا نفسهم وبس ... هما لما بيتعادلو مع فريق كبير ولا يكسبوه بالعافية ولا حتى يخسرو منه بشرف بيفتخرو بمنتخبهم ومدربهم واحنا عندنا لما نكسب تالت اقوى بطولة في العالم او نكسب بطل العالم ونقطع اقوى فريق في تاريخ كرة القدم بنقول مدربنا بيكسب بالحظ والكفته ودعاء الوالدين ... احنا بنكون شاطرين بس لما بتكون ايدينا في ايد بعض وقلبنا على قلب بعض عشان الروح الوطنية المخيفة المتغلغلة في صدور المصريين والتي تستطيع قهر كل ما أمامها حتى ولو كانو كائنات فضائية مش شوية لاعيبة كورة ... ولكن على مستوى كرة القدم وعِلْم كرة القدم احنا ما عندناش دوري ولا عندنا عدد كبير من المحترفين على مستوى عالي يقدرو يعوضو ضعف الدوري ولا حتى عندنا امكانيات بدنية عالية ممكن ان المدرب يستخدمها لتعويض السرعة والمهارة ولا اساسا عندنا قاعدة للناشئين ممكن اننا نشكلها زي ما احنا عايزين ... امال انا بعشق حسن شحاتة لدرجة الجنون ليه: لأن الراجل ده مش بيطلع من الفسيخ شربات زي ما بيقول المثل , دا بيطلع من الصرف الصحي شربات ... ولو انتا بقى جاي دلوقتي بعد ما ضاع مننا الوصول لكاس العالم تقول اصل الكبار هما اللي طول عمرهم بيحققو انجازات مش اللي تطلع فيهم طفرة مفاجاة ... لا يا صاحبي , الموضوع ما يتحسبش كده ابدا: اه في مدارس كروية معروفة في العالم زي البرازيل والارجنتين والمانيا وايطاليا وكل الناس دي ... ولكن هذا لا يمنع ان منتخبات كولومبيا والباراجواي او منتخبات كرواتيا وتشيكيا هي منتخبات شديدة الاهمية على الساحة القارية على الاقل ... وبعدين ((وبيني وبينك كده وبالبلدي يعني)) اللي يغلب كبير الحتة يبقى معلم ولو حتى لفترة بسيطة ... والا ما كنش غلبه وتفوق عليه.
خامساً: رضي القتيل ولم يرضى القاتل
مصادرة الاخر قبل حتى ما يعمل حاجة كارثة شنيعة ... وهتخليك طول الوقت غير راضي عن هذا الاخر ولو حتى اصبح اسطورة وهتوصلك لمرحلة ان لو حتى الاخر ده قدر ان هوا يسعدك ويفرحك هترفض هذه السعادة وستظل مُصِّر على ان تكون كئيباً ... أنا بقول الكلام ده لكل اللي مش عاجبهم انتقال جمال حمزة للأهلي ... وبعدين في حل بسيط قوي: لما جمال حمزة ما ينجحش ابقو ساعتها سِنو سكاكينكم وطلعو سواطيركم وادبحهوه دبح.
سادساً: الماضي والحاضر والمُسْ...
لكل البكاء الغير مفيد على الأقصى أقول: سباق التطور والتقدم لا ينتهي او يتوقف عند الشعوب المتحضرة ... فقط الجهلة هم من يصرون على ان يكونوا متخلفين , وان يكونوا فاسدين , وان يكونوا منحلين ... وبلاش نتكلم اكتر من كده عشان نعرف نروح ... بس خود بالك من حاجة مهمة قوي: الكيان الصهيوني هو مشروع اجتماعي اقتصادي سياسي مفيد للدول الكبرى , وبالتالي هو لن يكون اكثر من ذلك واذا تسبب في مجرد ازعاج لهذه الدول او اصبحت ارباحه قليلة او وُجِدَت طرق للربح افضل منه , سيتم إنهاء هذا المشروع وإغلاق كل فروعه ... صحيح إن الصهاينة بيذلوا كل مجهوداتهم عشان يساعدو على استمرار نجاح هذا المشروع , وإنهم بيغتالو كل اللي ممكن يوقف في طريق نجاحم زي ما عملو مع كينيدي واسحاق رابين وولي عهد السويد , وإنهم بيزيحو اللي ممكن يقلل حتى نسبة الارباح زي الشيخ أحمد ياسين ود. يحيى المشد ود. درية إبراهيم , وإنهم بيعطلو حتى اللي ممكن يقدم حاجة بسيطة جداً للدول العربية زي ما عملو مع كلينتون وجورج بوش الأب والأميرة ديانا ... كل ده مضبوط وما قولناش حاجة بس يجب أن نعلم أننا نحن الضعفاء , نحن اللذين تخلفنا وانهارت حضاراتنا , نحن اللذين فرطنا في ديننا وثقافتنا , نحن اللذين ارتضينا أن نكون في ذيل الأمم , نحن اللذين نشرب دماء محمد الدرة ونأكل لحم إيمان حجو ونقول أن المقاطعة شيء شديد الصعوبة والتعقيد ... الحكاية باختصار ومن غير كلام كبير: في واحد كان ساكن في شقة راقية قوي في الدور العاشر , وواحد تاني كان ساكن في شقة كويسة ومش بطالة يعني في الدور التالت , وكل اللي حصل إن اللي في الدور العاشر راح سكن في عشة فراخ في الشارع , فبقى اللي في الدور التالت وعنده شقة مش بطالة - بس اهو اسمه عنده شقة - بقى احسن بكتييييير من اللي ساكن في عشة الفراخ اللي في الشارع ... دا غير بقى إن الناس لما لقوه ساكن في الشارع وموسخه , راحو تعاملو معاه على إن عشته دي هي مقلب الزبالة بتاع الحي كله ....
وهوا سعيد قوي وهوا عايش وسط الزبالة !!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!
سابعاً: عود كبريت في مغارة الظلام
البرادعي هو حلم جميل يتم ذبحه بسكين باردة ... ولو نجح في الانتخابات - ودي هتكون الأعجوبة التامنة على فكرة - سيحتاج معجزة مهولة عشان يعرف بس يقلل نسبة الأمية في مصر ... ولكن إنك تقولي إن الفساد او الفقر هيقل حتى , هقولك اسف لأننا احنا اساسا فاسدين , ولما احنا نكون كويسين هتبقى كل حاجة كويسة إن شاء الله لو اللي حكمنا كان من كوكب بلوتو ... احنا حتى في ترشيحنا للبرادعي فاسدين , وكل واحد عايز مصلحته وبس ... حد راح قعد مع البرادعي وقاله ممكن نطور وزارة الصحة ازاي , نطور وزارة الداخلية ازاي , نطور البحث العلمي ازاي ... دا بالعكس احنا عايزين نصنع منه فرعون جديد: اللي يقولك اهو اي حاجة غير اللي موجود , واللي يقولك مهو هيبقى الريس بقى ويقدر يغير كل حاجة للأحسن بالعصاية السحرية اللي مخبيها في ودنه أو - وده الأخطر والأشد إيلاماً - بالسُلطات الضخمة اللي في ايد رئيس الجمهورية ... طب قبل ما تطلب التغيير انتا اساسا اتغيرت ولا لا , انتا بقيت كويس ولا لا , انتا بقيت انسان ناجح ولا لا , انتا بطلت تشرب مخدرات ولا لا , انتا بطلت تشتم بالام والاب والدين ولا لا , انتا بطلت تسمع الاغاني الهابطة ولا لا , انتا بطلت تتفرج على افلام تافهة ولا لا , انتا بقيت كويس في دينك ولا لا ... لا يا صاحبي لا , دا احنا ما ينفعش معانا مش البرادعي وبس , دا ولو الطاقة الذرية اللي في العالم كله جت عشان تخدمنا مفيش فايدة.
والسلام ختام يا ناس يا كرام
