لم أشاهد المباراة على الهواء مباشرة
واليوم شاهدت إعادة المباراة كاملة من أول دقيقة حتى أخر المباراة
فرصة مهمة أضاعها عماد متعب في الشوط الأول
كرة مرفوعة من الجنب اليمين على الزاوية القريبة لعبها لاعب الاتحاد براسه للخلف على الزاوية البعيدة ، حطها عماد متعب جنب العارضة .
اللي تابع اللقطة كويس هيعرف إن عماد متعب كان هيحط الكورة في الزاوية العكسية لكنه شاف محمد الدعيع قافل الزاوية قدامة ، فغير رأيه وحطها في الزاوية القريبة منه ولكنها كانت بجانب القائم .
واحد من استديو التحليل السعودي قال إن المفروض عماد كان يحط الكورة برأسه في الزاوية العكسية ودا كلام صح ومظبوط ، لكن لما اللقطة اتعادت تاني بصيت عليها لقيت عماد فعلا كان هيحطها في الزاوية البعيدة اللي هي الزاوية العكسية ، لأن الكورة جاية من اليمين لليسار ، كان مفروض عماد يحطها في الزاوية الشمال البعيدة أو العكسية عكس اتجاه حارس المرمى لكن الدعيع كان قافل على متعب
وطبعا كلنا عارفين براعة متعب في ضربات الرأس ومش محتاج حد يقوله ازاي يلعب الكورة
لكن فعلا مكنش ينفع يحطها في الزاوية العكسية
تغيير القرار هو اللي ضيع الفرصة
المهم بصرف النظر عن ضياع الفرصة لأن دا بيحصل من أفضل اللاعبين
لكن المهم والأهم هو رد فعل محمد نور
محمد نور لما عماد ضيع الكورة بص لزمايله وأشار على عماد متعب ، وكأنه بيقول لزملائه شايفين الفرصة اللي ضاعت دي ، دي فرصة تضيع ؟
واتجه لعماد وهو واقع على الأرض وعنف عماد متعب بشكل غير لائق
واللي يشوف اللقطة من بعيد يفتكر إن محمد نور بيبصق على عماد متعب ، لكن لما تتعاد اللقطة من قريب واضح إنه كان بيعنفه .
محمد نور هو كابتن فريق الاتحاد وهو محبوب جماهير الاتحاد الأول
حاليا متعب يشارك نور في حب الجماهير لأنه من أول مباراة وهو خطف الأضواء وسحب البساط من تحت أقدام محمد نور وأصبح متعب هداف الدوري السعودي بـ 7 أهداف يليه محمد نور بـ 6 أهداف .
معلق المباراة كان بيوصف متعب بـ ملك الهدافين ، أو عميد الهدافين وعلطول يقول العمدة
تصرف نور لا يليق بكابتن فريق ، دور كابتن الفريق هو إنه يساعد أفراد الفريق على التألق ومساعدتهم على الثقة بأنفسهم ، لكن تصرف نور فعلا أثر على أداء متعب في الشوط التاني ، والأغرب إن متعب طول الشوط التاني وهو بيلعب تحت راس الحربة ودا مش مكان متعب
الأغرب إن طول الشوط التاني مفيش كورة واحدة راحت لعماد متعب
ماعدا كورة واحدة في نهاية الشةط التاني
كل الكرات رايحة لمحمد نور
واضح إن محمد نور هو الفتى المدلل لنادي الاتحاد ويبدو إن كل اللعيبة بتخاف منه
وواضح إن نور بيغير من متعب لأنه خطف منه الأضواء أو حزء كبير من الأضواء
فيه فرصة ضاعت من الهلال أسهل بكتير من فرصة عماد متعب بعدها بدقيقتين
مفيش حد عاتب اللاعب ولا حد بص له بنظرة
يا كابتن محمد نور المفروض إنك تشجع زميلك عندما يخفق في تسجيل هدف أو إذا كان مدافع وتسبب في هدف ، يعني مثلا رامي عادل لما أحرز هدف في مرمى الأهلي وهو مدافع الأهلي لم يعنفه أحد ولم يعاتبه أحد ، بالعكس حسام البدري المدرب العام شجعه حتى لا يفقد ثقته بنفسه .
هو دا تصرف الكبار
هو دا دور القائد
لكن لما كابتن الفريق يعنف زميله هداف الدوري بالشكل الغير لائق ده
يبقى تصرف لا يليق بكابتن الفريق
يبقى كابتن الفريق محمد نور لا يصلح إنه يكون كابتن الفريق
واضح إن محمد نور كان منتظر فرصة لعماد متعب علشان يهاجمه
إشارة محمد نور لزملاؤه بعد ما عماد ضيع الفرصة معناها كده
معناها بيقول لزملاؤه ولجمهور الاتحاد
شايفين الفرصة السهلة اللي ضيعها متعب ، وبعدها اتجه لمتعب يعنفه بشكل غريب اللي يشوف المنظر من بعيد يقول إنه بيبصق على عماد متعب .
يبقى ازاي الاتحاد يفوز وفيه لاعب بيغير من زميله
مش عاوز أقول بيحقد عليه لأن كلمة حقد دي كبيرة .
حتى بعد المباراة في وسط الملعب محمد نور قاعد يزعق لباقي اللعيبة
ودا يؤكد إن محمد نور بتاع منظرة
لو فعلا زعلان وبيحب الاتحاد المفروض الكلام دا يكون داخل الغرف المغلقة
حتى لعب محمد نور واضح إنه بيلعب لنفسه ، بيلعب للجمهور لأنه بيحاول يراوغ بطريقة الهواة علشان الجمهور يقول : هيييه برافو يا نور
أعتقد لو محمد نور بيلعب مع جوزيه كان هيبقى مكانه نفس المكان بتاع محمد عبد الله لما كان بيلعب مع الأهلي ، وبيلعب بطريقة الهواة .
