يا بنى ليه تكبر بسرعه
فين طفولتك الجميله
صوت خشن ودقن طالعه
فجأه كده بين يوم وليله
والمناقشه ف كل حاجه
والمناهده والتناحه
واللماضه واللجاجه
والرخامه والاباحه
والمعارضه والمجادله
والمزاج عجيب مكهرب
مره تبقى ف حاله عدله
وعشره تمشى بعيد وتهرب
فاكر اما كنت بيبى
كنت اموت انا ف كلامك
والنهارده بس جيبى
هو محور اهتمامك
كان كلامك كله انك
يا جميل تحب بابا
والنهارده كل زنك
شوفلنا ميايه يابا
قوللى راحت فين براءتك
اللى كانت ماليه عينك
شالها مين وجاب جراءتك
والعبوس ده فوق جبينك
كنت دايما تحلا نومتك
وانت متشعبط ف حضنى
والنهارده لما لومتك
كنت ناقص قال تشوطنى
غير جدالك ويا امك
والقسا شقلب ف حالك
مش عايزها قال تضمك
والجفا ليه فجأه جالك
يابنى عاوزينك معانا
ف الطفوله و ف شبابك
ده انت اقرب من حشانا
واحنا اولى من صحابك
ياللا فتره وراح تعدى
كل واحد مر بيها
كنت قدك برضو والدى
عاش سنين صابر عليها
عدى يا للا وابقى راجل
عنده خُدْ..مش كله هات
واما أمشى وابقى راحل
راعى امك والبنات
منقوول للأمانة