1- من اول واحد ساعدك فى المنتدى؟
اول شخص بجد وقف جنبي جدا وساعدنى في المنتدى وكان دايما بيشجعنى هى لولى لانها كانت من أول الاعضاء اللى سجلوا في المنتدى وبعديها على طول رضوى وهشام وعلام وسما وميدو ومنه ، وكان فيه بردة عضوتين سجلوا زمان اوى مع لولى كدة : سلمى ويمنى .. بردة ساعدوني جدا وكانوا بيبذلوا مجهود كبير اوى في المنتدى
2- هل كونت خايف لحسن المنتدى يفشل؟
اكيد اى حد بيبدأ في حاجة بيبقى عنده خوف انه ميكملش فيها ، بس الحمد لله انا كان دايما عندى أمل أن المنتدى حيكبر وحيحقق كل اللى بتمناه ، وتشجيع كابتن عماد ليا وكمان مجهود الاعضاء وحماسهم وحبهم للمنتدى وخوفهم على مصلحته كل دة كان بيطمنى ان المنتدى حينجح ان شاء الله
3- ازاى بتقدر تتحكم فى اعصابك لمة تلاقى حد مستفز بيرد فى اى توبيك علشان يعمل مشاكل ؟
التحكم في الأعصاب دة شئ جميل ومهم جدا في التعامل مع المشاكل ، لأن لما يكون فيه شخص بيحاول يستفزك لو انت فعلا اتنرفزت واتعصبت يبقى كدة هو عمل اللى هو عاوزه وقدر يخرجك عن شعورك ، إنما لو حافظت على هدوءك وتحكمت في اعصابك انت كدة حتستفزه وتكون بتوصله رسالة انه مقدرش يعمل اللى هو عاوزه ودى اول خطوة لإنهاء المشكلة لانه ساعتها بيبقى فيه حاجة من اتنين يا إما الشخص دة يكون متنرفز غصب عنه وساعتها لما يلاقيك هادى حيحتوى الموقف وينسى المشكلة ويا إما يكون داخل عشان يعمل مشاكل ومتعمد ينرفزك وفي الحالتين ببقى كدة وصلت لحل المشكلة ..
عشان كدة الهدوء والتأنى هو أساس حل أى مشكلة
بس طبعا انا منكرش ان احيانا بيبقى الواحد منفعل ومش بيقدر يتحكم في اعصابه .. وده شئ طبيعي ، بس انا بحاول على اد ما اقدر انى اكون هادى ومتحكم في اعصابي وانفعالى ..
4- هل انتة مرتبط ؟
لا
5- يا ترا حبيت قبل كدة من على النت واية رئيك فى الحب عن طريق النت ؟
لا .. صعب اوى توصل لدرجة حب
وانا رأيي في الحب عن طريق النت انه نادر جداااا ، وبيبقى احيانا كتير تسليه ، واحيانا بيبقى مجرد اعجاب ، لأن اى كلام بين شخصين على النت بيحتمل نسبة من عدم الصدق .. عشان كدة بيبقى صعب اوى ان الحب دة يكون صادق .. عشان كدة زي ما بقولك الحب عن طريق النت نادر جداااااااا
6- يا ترى مين هما اقرب الناس ليك فى المنتدى وبتحبهم كتير جداا وبتحس ان هما كل حاجة فى حياتك؟
كل الأعضاء والمشرفين والمراقبين الحمد لله بتربطنى بيهم علاقة طيبة جدا وبحاول دايما اكون متواصل معاهم في المنتدى ، ولو اى عضو بيبعتلي رسالة او استفسار معين الحمد لله مش بتأخر ابدا .. وانا بعتبر الاعضاء هما السبب الاول في نجاح المنتدى وهما العامل الاساسي في نشاطه وتقدمه ..
7- اية هية مواصفات البنت اللى تحب فى يوم من الايام ان هية تكون شريكة حياتك؟
طبعا اهم حاجة اهتمامها بالدين وتقربها لربنا ، وانها تكون متفائلة دايما وبتحب الخير لكل الناس ، واكيد طبعا تكون بتحبنى وبتفهمنى من اقل حاجة
8- لية يا محمد البنات اكتر من الولاد فى المنتدى ؟
قبل ما اجاوب انا عاوز اوضح حاجة .. عدد الأولاد في المنتدى تقريبا بيمثل نسبة 40 % او اقل بشوية ، يعنى الفرق بين عدد الاولاد والبنات مش كبير اوى .. ولكن العدد دة مش كله نشيط او بيشارك باستمرار في المنتدى ، تقريبا نص العدد بس هو اللى نشيط وبيشارك ودة اللى مخلي فيه احساس ان عدد الاولاد قليل ، وبالنسبة بقى لأن عدد البنات اكبر من عدد الأولاد اعتقد ان السبب ان الكورة خدت شكل وطابع تانى في مصر في السنين اللى فاتت وبدأ يبقى فيه جمهور لمنتخب مصر والاندية من البنات ، وكان واضح دة جدا في كأس الأمم الافريقية 2006 في مصر وبدأت تزيد جدا في الفترة اللى فاتت ، يعنى لو دخلت اى منتدى لاى لاعب مثلا ابو تريكة او بركات حتلاقى بردة تواجد كبير من البنات ، واللى مخلي كمان العدد اكبر عندنا ان الحمد لله عماد محبوب من كل جمهور النادى الأهلى ومنتخب مصر سواء اولاد او بنات او اطفال او ... او ....
9- اية اكتر موقف عمرك ما هاتقدر تنساة فى حياتك؟
يوم وفاة عمى ( الله يرحمه )
10- اية اكتر موقف حسيت انك ندمان علية فى حياتك؟
هو موقف حصل من فترة طويلة ، وهى ان واحد جه وصللى كلام عن واحد صاحبي وكان كل هدفه انه يوقع بيني وبينه ، وللآسف قدر يخلق مشكلة كبيرة بينى وبينه ، بس الحمد لله اننا عرفنا الحقيقة والمشكلة انتهت على طول ، ساعتها انا وصاحبي ندمنا جدا اننا صدقنا الكلام من غير ما نتأكد
11- اية رئيك فى رابطة مشجعى الاهلى وهل تتمنى ان هية ترجع تانى للاستاد ؟
انا بعتبر رابطة مشعجى الاهلى وجمهور الاهلى عامة اللاعب رقم واحد مش اللاعب رقم 12 زي ما بيقولوا ، وبجد وجود الرابطة بيبقى مهم جداااا في الماتشات ، وياما كان ليها دور كبير ووقفت مع الفريق في مواقف صعبة ، وكفاية الشكل الجميل والتشجيع المثالى في المدرجات بجد بيخلى للماتش شكل تانى ، واتمنى طبعا انها ترجع تانى زي الأول واحسن ان شاء الله
12- لمة بتكون مضايق من كل حاجة فى حايتك يا ترى بتحب تروح فين ؟
اى مكان هادى اكون موجود فيه لوحدى ، واول حاجة اعملها استعين بربنا سبحانه وتعالى وادعى ان ربنا ييسر ليا المشاكل ويهون عليا همومى
واراجع نفسي عشان لو كنت غلطان في حاجة اصلحها
13- اشمعنى يعنى حبيت تعمل المنتدى دة باسم عماد متعب وهل فية حد ساعدك فى هذا المنتدى الجبار؟
اول مرة شفت فيها عماد مع منتخب مصر للشباب لفت انتباهى جدا ، وبدأت اتابع ماتشاته مع المنتخب ومع فريق الشباب بالنادى الأهلى وكنت واثق انه حيكون لاعب كبير ومهاجم اساسي في منتخب مصر والنادى الأهلى ، وقولت لنفسي ليه ميكونش فيه موقع ومنتدى بإسم عماد ، والمنتدى يضم كل حاجة تخص عماد : اخبار وصور واهداف ولقاءات و ........ ، ويتجمع في المنتدى كل اللى بيحبوا عماد ويكون حلقة الوصل بينهم وبين متعب ..
وفعلا عملت المنتدى وصممته وبدأت احط فيه كل ما يخص عماد واجمع كل اخباره وصوره واهدافه وبلغت عماد بالمنتدى عشان يبقى بشكل رسمي ، ودة تقريبا خد اكتر من 3 شهور ، وطبعا فيه ناس كتير ساعدوني في بداية المنتدى زي ما قلتلك زي لولى ورضوى وهشام وعلام وغيرهم ...
14- ماذا تمثل لك عائلتك فى حياتك ومين اقرب حد ليك فى عائلتك ؟
طبعا اسرتي هى كل حاجة في حياتى
واقرب حد ليا : والدتى
15- اية رئيك فى الخاينة فى الحب او فى الجواز ؟
الخيانة دى انا شايفها اسوء صفة ممكن تكون موجودة في الإنسان ، وهى السبب في مشاكل كتير ممكن تحصل بين اى وزجين او بين اى اتنين ، وانا بعتبر الكذب خيانة ، وان الواحد يدارى شخصيته الحقيقية خيانة ، او يحاول يخدع اللى قدامه بمظاهر كدابة خيانة .
16- اية اكتر اشاعة حسيت ان هية صح وممكن تحصل فعلا ؟
لا بصراحة مفيش اشاعة سمعتها وصدقتها لدرجة انى احس ان هي حقيقة وممكن تحصل فعلا
17- انتة بتحب تقضى اكتر الاوقات فين ؟
للآسف اكتر وقتى بقضيه في الكلية بس طبعا دة غصب عنى يعنى مش بإرادتي
بس في الغالب بقضى اغلب وقتى مع اصحابي والباقى مع اسرتي في البيت
18- اية اكتر حاجة بتجزبك للبنت من اول نظرة ؟
اولا اهتمامها بالدين ، واسلوبها في الحياة وترتيبها لوقتها ، وطريقتها في الكلام وفي تعاملها مع الناس
واكيد شكلها ومظهرها
19- اية اكتر لعبة بتحبها على الجهاز عندك ؟
Fifa 2005
20- من هو احسن ممثل بالنسبة ليك؟
أحمد السقا
20- مين احسن ممثلة من وجهة مظرك؟
غاده عادل
21- مين احسن مغنى ومغنية من وجهة نظرك؟
عمرو دياب
شرين وجدى
22-انتة عاوز تكون اية فى المستقبل ؟
اتمنى انى اكون مهندس ناجح ، واحقق كل طموحاتى ، واكون ناجح في شغلى واقدر احقق حاجة لبلدى
23- هوة ازاي بيقدر يوفق بين
الاشراف العام بين هنا وبين المنتديات التانية وخصوصا ان هنا المنتدى ما شاء الله عليه اقبال
والى حد ما بيحصل مشاكل وما شاء الله عليه يعني هوة بيحلها ببساطة؟
أولا انا مش مشرف في أى منتدى تانى ، وكل علاقتى بالمنتديات التانية يإما عضو زي المنتديات الكبيرة ، او صاحب الادمن في بعض المنتديات ، لكن مش مشرف ولا مراقب ولا أدمن في أى منتدى تااانى
ويكفيني اوى انى اكون موجود معاكو هنا ، والحمد لله بحاول على اد ما اقدر انى اعالج الاخطاء اللى بتحصل في المنتدى او اى مشكلة بتحصل والحمد لله بلاقى تجاوب ومساعدة كبيرة من الاعضاء وده اللى بيخلينا دايما بنتغلب على اى مشكلة بتقابلنا
24- وهل المنتدى وصل لطموحاته اللى كان عايزها فيه ولا لسه واللى ناقصه عشان يوصل ؟
الحمد لله انا راضي تماااما عن كل اللى وصله المنتدى ، والحمد لله المنتدى حقق نجاح اكتر من اللى انا كنت بتمناه ، واى نجاح حققناه او حنحققه إن شاء الله فأنا بهديه لكل اعضاء المنتدى
25- ايه هى طموحاته الشخصية فى الحياة وحلمه اللى نفسه يحققه ؟
انى اكون ناجح في شغلى ، واحقق حاجة لبلدى ، وانى اشوف عماد احسن لاعب في مصر واشوفه في احسن الاندية في اوروبا ان شاء الله
وحلمى انى اشوف مصر احسن بلد في الدنيا
26- ياريت يحكلينا عن طبيعة شخصيته لانه قليل الكلام وغامض جدا؟
لا بالعكس انا مش غامض ولا حاجة انا بحاول اكون متواجد باستمرار في المنتدى واشارك في اكتر المواضيع على اد ما اقدر ، وبخصوص شخصيتي انا اسمي محمد نجم 20سنة ، من طنطا ، طالب في كلية هندسة طنطا عندى اختين اصغر منى ، بحب الخير لكل الناس ، اكتر عيوبي انى احيانا بتضايق من حاجات متكونش مستاهله وممكن في بعض الاوقات انرفز نفسي على حاجة بسيطة ، بحب النظام والإلتزام بالمواعيد جدااااا ، اكتر هواياتي ممارسة ومشاهدة كرة القدم والنت والموسيقى
27- هو انا ليه ساعات باحس انه بيقيد حرية الاعضاء فى التعبير عن رأيهم فى اى موضوع يخص نجمنا عماد متعب ؟؟؟؟؟؟؟؟
يعنى بابقى عارفة و متاكدة انه عايز مصلحة المنتدى و مصلحة عماد لكن مش عارفة يه بيوصلنى الاحساس ده .......
يا ريت الاقى عندك اجابة يا احلى ادمن؟
ميرسي ليكي جدا على السؤال الجميل والمهم جدا دة ، انا فعلا ممكن ساعات اكون بقفل توبيكات معينة بتتكلم عن عماد او بتناقش حاجة معينة بخصوص عماد ، بس دة بيبقى لمصلحة المنتدى اولا ولمصلحة عماد طبعا ، بس في نفس الوقت عمرى ما بقيد حرية الاعضاء في التعبير عن رأيهم بالعكس انا دايما بحب اعمل استفتاءات بخصوص عماد زي مثلا هل توافق على ان عماد يعمل كذا او كذا ، وبحب دايما ان الاعضاء تتناقش وتقول رأيها لان دة الهدف الأول للمنتدى ، وإن لو فيه مميزات في متعب كلنا نتكلم عنها ولو فيه عيوب نتناقش فيها ونشوف اسبابها وطرق حلها ، بس في بعض الحاجات اللى مش بحب انها تكون موضوع للنقاش زي حياة عماد الشخصية لان دى مخالفة اولا لسياسة منتدانا كموقع رسمي لعماد متعب ، وثانيا لان الكلام في الحياة الشخصية لأى شخص لازم تكون بحدود وبدون تجاوز في الشخص دة ، عشان كدة احيانا لما احس ان فيه توبيك حيسبب مشاكل او حيكون فيه بعض التجاوز في حق عماد بضطر اقفله لمصلحة متعب ولمصلحة المنتدى
