ليه غيرتنى؟ ..لما انت عارف ان حكايتى معاك
زى حكاية فراشة بتقرب م النور ومش فكراه هلاك
وان مصيرها الموت
زى حكاية اسيرة خرجت برة سور ..نطت جوة مركبة ...تاهت فى البحور
مش لاقية من يومها شطوط
ليه غيرتنى ؟..لما انت خاين ..وناوى مالاول تسيبنى ..كنت مالاول سيبتنى
كنت بتغيرنى لمين ؟؟..
ليه خدتنى؟ من دنيا كنت عايشة فيها ..لدنيا تانية فيها توهتنى
مش عارفة السكة فين
كنت عايشة وكنت راضية بدنيتى ..
لا عايزة اتحب ولا احب..عارفة روحى مش قد عذاب الحب
كنت وحيدة ..بس بعيدة ...عن وجع القلب
كنت عايشة ..وكنت راضية بالسكوت
وقافلة باب كل الفرص
كان قلبى زى عصفور جوة القفص
ومشاعرى ف تابوت
حواليه حرس
جيت قربت منى ..وفتحت القفص ..وهزمت الحرس
و كأن قلبى ما صدّق ...لقيته فرد جناحاته وف سماك طاير
فرحان وبيزقزق...اتاريه طول عمره متشوّق
واتارينى مستنيّة طول عمرى ..تيجى وتفك الضفاير
وتخطفنى ع الفرس
لقيت مشاعرى بتتفتّح زى وردة..اول مرة بتدوق الندى..دوقت الندى
ولقيت طريقى معاك ابتدا
كان حلو ف اولو
شفت حاجات ..عمرى ماشفتهاش ..حسيت حاجات ..عمرى ..ما عشتهاش
كان كل شىء فى الكون بشوفو بعيونك ..وعيونك ..بتجملو
حلمت امشى وياك الطريق لاخرو واكملو
وبعد ما كنت وحيدة ...لقيتك ونس
عليك عودتنى..
مابقيتش قادرة اعيش الا بيك ..مابقيتش عايشة الا ليك
ولما خلاص غيرتنى..ملكتنى ..اسرتنى
وقلبى حكمتو بايديك
قلتلى وقتى انتهى...ضرب الجرس
وفجأة لقيتنى ف كابوس
وانى قصة من القصص
قصة مارد جوة الفانوس
خرج اول ماتلمس
ليه بس ليه طلّعت قلبى من القفص؟؟
ولما طار معاك بعيد فى الفضا .....
كسرت جناحه وسيبته ينادى ..ما يردش عليه غير صدا
وانت ؟؟..ولا بتسمع ...ناويها م الاول تخدع
وتسيبه بعد ما علقته بيك...يحلم بيك بترجع.....ولا بترجع
وينتهى مشواره من قبل حتى ما ابتدا
وقبل ما يدق بصوت ....اتخرس
وقبل ما يعيش ، قطع النفس
ليه غيرتنى؟..كنت سيبتنى
دلوقتى مش هقدر ارجع زى ما كنت بعد اللى عشته وشفته ...والهنا اللى انا دوقته
ولا هقدر من تانى اسلم واروح....لحب تانى ..يرجعلى قلبى مجروح
سيبتنى ...بين السما والارض....بين الحياه والموت
لا قادرة اتكلم ولا قادرة حتى ع السكوت
جسد عايشه من غير روح
والمارد اللى خرج برة الفانوس ازاى من تانى
يتحبس..؟؟؟؟؟