انا بعد اذنكو قريت مواضيع كتير عن اللى مكتوب على الحضرى و حبيت ابينلكم وجه نظرى هنا:-
فى اييه يا جماعه مالكو مش طايقين الحضرى لييه؟
الراجل جاتله فرصه قبل كده وضاعت ماتتخيلوش ان لما تجيلو فرصه تانيه هيسيبها ! ده التفكير الطبيعى لكل انسان لو كان حصل ده مع اى حد منكو كنتو عملتو نفس الحكايه.
الحضرى ماهربش ولا خان ناديه . الحضرى لقى فرصه و حاول ياخدها قبل ما تفوت ولا انتو عايزين احسن حارس فى افريقيا يفضل طول حياته فى النادى الاهلى يجيبله بطولات و مايحترفش و يجر حظه ابدا؟ ده حتى يبقى حراام!
انتو نسيتو هو عمل ايه للاهلى؟ نسيتو كام ماتش هو شاله لوحده و اللعيبه ماكانوش فيه فى مستواهم؟ نسيتو هو قعد كاام مباراه من غير مايدخل فيه جون واحد و ضاف للاهلى لقب و تاريخ؟
امتى هتفهمو ان اللعيبه هم اللى بيصنعو النادى و يسيبو بصمتهم فيه و اللعيبه هم اللى بيرفعو شأن النادى او بيهبطوه وهو اللى بيجيبولو بطولات و هو اللى بيخسروه؟ ولا هو معاك معاك عليك عليك؟ مش هو ده الحضرى اللى كان من شهر بطل افريقيا وحش مصر السد العالى احسد حارس مرمى فى القاره؟ فجأه عشان محاوله جربها عشان مستقبله كله نسى و كلو طلع الحقد الى عنده و كلو بيعاير الحضر هو نسى جه منين؟ و انه ولا حاجه من غير الاهلى و يشوف هيعمل ايه لما يمشى! فين بأه الفكر الاحترافى؟ ده مش فكر ده همج من الاعلام والجمهور.
و بعدين ايه حكايه الحجاب دى؟ ما مليون بنت ممكن تقلع الحجاب و تلبسه و ماحدش بيقول غير ربنا يهديها ؟ و لا هو عشان الحضرى راح سويسرا كله عايز يطلع اى كلمه وحشه يرميها فى وشه؟ و عيب عليكو تقولو على زوجه محترمه و مسلمه الكلام ده .
فجأه اخلاقها و حشه و عقليتها وحشه؟ و بعدين ايه عشان الجمهور دى؟ هو الجمهور هيحبها و لا يتجوزها؟
وانا متأكده ان الحضرى لو ماكنش سافر و شفته زوجته من غير حجاب مش هتقولو حاجه و هتقولو دى مشكلتها هى و ربنا يهديها. ياريت تفكرو انتو بتقولو فى ايه و بتغلطو فمين؟ و شوفو بتقولو على مين مش مخلصين. مش المفروض اننا جمهور الاهلى احسن جمهور فى مصر اللى بيقف مع فريقه و يشجعه فى كل المواقف؟ مع اول موقف يتعرضله لاعب نعمل فيه كل ده زى مايكون غير ديانته ولا كفر بالله؟
يا اهلاويه بصو انتو بتعملو ايه و راجعو نفسكو و ياريت نقف مع الحضرى فى الموقف ده و فى نفس الوقت مع النادى الاهلى من غير تعصب و بكل حب.
