يا واخد القرد على ماله ..يروح المال ..ويفضل القرد على حاله
طبعا الصدمة كانت شديدة أوى على كل الناس..أهلوية ..زمالكوية..اسمعلاوية ..كل المصريين
عصام الحضرى ينهى مشواره فى النادى الأهلى و مصر بهذا الشكل..
خلاص مفيش أرقص يا حضرى..ممكن يبقى يتقال له..-أتزحلق على الجليد يا حضرى- زى ما أتزحلقت من قلوبنا..
أنا شخصيا مصدومة جداااااااااااا لغاية دلوقت..
و أوعدكم وأوعد نفسى ان مش لازم نكبر الموضوع أكتر من كدة..لأن للأسف الموضوع ميستهلش.
لكن فى حاجات لازم تتقال:
1- لا يمكن قبول نغمة ان الأهلى هو السبب لأنه كان كما يقال مداش الحضرى مكانته أو حقه..
ده تهريج ..لأن الأهلى هو اللى وقف بجانب الحضرى طوال ال13 سنة اللى فاته ..ده بجانب موهبة و تفانى الحضرى فى اللعب للأهلى مبننكرش..لكن الأهلى قدرده تقدير كبير جدا و لا يمكن ان الأهلى يكون هو اللى ناكر للجميل فى الآخر!!!
2- من حق أى لاعب الاحتراف..و ده شىء رائع فعلا أنه يحصل ..و مش علشان مصلحة اللاعب ..لأ ..ده علشان مصلحة مصر..اللى هى كمان أهم من أى نادى..و لكن ليس بالأسلوب البشع اللى عمله الحضرى مع ناديه و جمهوره..
بأة يبقى فى ماتش المصرى اللى فات ..الجمهور والله العظيم هتف للحضرى أكتر ما هتف لأى واحد تانى فى الملعب..
و تانى يوم ..يمشى كدة ..فجأأأأأأأأأأأأأأأأة...من غير أى مقدمات..ده ولا أما يكون كان معاشر يهود..مش الجمهور اللى هتف له و بيعشقه!!!!!!!
3- فكرة أن الحضرى مشى علشان موضوع الشارة..دى فكرة أسخف من انها تكون سبب انه حتى فى يوم يقرر انه يدلع شوية فى التمرين و يتمايص عليهم..مش سبب أنه يهج و بالطريقة الشنيعة دى!
4- فكر ة أنه مش حاسس بأى تقدير..و لا حرف و لاكلمة..دول اللاعبين بتوع المنتخب و على رأسهم الحضرى أتقدروا بحجم أكبر بكتير من أى حد تانى فى البلد عمل أى حاجة علشان مصر ..و اتقال عليهم كلام سواء على المستوى الشعبى أو الحكومى متقلش على صلاح الدين الأيوبى..و مش دلوقت بس ..لأ ..ده من أيام 2006!
5- فكرة أن جمهور النادى الأهلى مش مقدره..و دى للأسف سمعت أنه قالها..لكن مش متأكدة..لكن بعد تصرفه ده..مش بعيد يكون قال حاجة زى دى فعلا..مش حستغربها يعنى..
فأظن جمهور النادى الأهلى و حبه للحضرى مفيش واحد فى العالم يقدر ينكره و كفاية حرقة الدم اللى كل الناس فيها من تصرفه ده..يعنى لو هو مكش غالى عند الناس ..كانت الناس هتهتم ليه..لكن..على رأى شادية..كان فعل ماضى حنيسيبه فى حاله!
6- بصراحة للأسف يظهر ان النجومية الشديدة و التفخيم و التعظيم و كلام الشعر و القصائد ..بتجيب نتايج عكسية..
لكن أتمنى أن ده ميكنش الحال مع كل باقى اللاعبين!!!أتمنى لأنى خلاص مبأتش واثقة!!!!!
7- و دى أهم نقطة من وجهة نظرى..على الكابتن حسن شحاته التفكير فى وضع حارس المرمى بالمنتخب..
و ده مش نتيجة الاهانة اللى شعر بيها كل الأهلوية من الحضرى على الاستهزاء بهم و بمشاعرم و بعقولهم لما مشى كدة و بدون حتى ميودعهم..فيكون عقابه عن طريق المنتخب..لأ..
و لكن ده بجد لأنى من المتوقع جدا هبوط مستوى أداء عصام الحضرى..لأنه ببساطة دلوقت النادى اللى راحه ده ..نادى أى كلام..فى دورى أى كلام..ده اذا لعب أساسا علطول..ولكن أكيد هو مش حيلعب معاهم علطول ..و بناء عليه يجب التفكير فى من هو الأجهز أدائيا و نفسيا بما أن نهائيات كأس العالم على الأبواب ..و خاصة نفسيا..لحارس المرمى..و لجمهور مصر اللى المفروض يبقى واثق فى اللاعب بتاعه..واثق!!!!!!
8- رأى من الممكن انه حيغضب البعض..أنا شايفة ان النادى الأهلى يسيبه من الحضرى خااااااااالص..ينساه..خسارة تبادل الاتهامات و الخناقات مع الفيفا علشانه ..خساااااااااارة..و لا حتى يفكر يأخد أى تعويض أو اجراء..مش يستاهل!
9- والله العظيم..حتى لو كان ما يقال صحيح..و ان النادى الأهبل ده اللى محدش سمع عنه كان محطة ..و الحضرى راح بعد كدة ..مانشستر يونايتد حتى...
برضه عمرى محسامح الحضرى أو ححبه أو ههتفله تاااااانى أبداااااااااااااااااااااااااااااااااااا..
10- ليس بالمال فقط تحيا النفوس فقط و تطمئن القلوب..ملعون أبو الفلوس ..ملعوووووووووووووووووووووونة!!!
...
أنا آسفة أنى طولت عليكم ..لكن الصدمة كانت شديدة أوى..لكن فرغت كل شحنة الغضب دى هنا معاكم ..أشعر ببعض الراحة..و لكن لسة الكثيييييييييييير من الحزن و الألم..حزينة على الحضرى والله العظيم..على تاريخه..اللى كان..
و كمان حسة أنه أضحك على...حسة أن حد أستغفلنى..بس بجد حسة بخوف..
خوف على بقية اللاعبين..معقولة....هل هناك حضرى آخر فى الطريق..
حضرى المفاجآت ..المفاجآت الأليمة..ممكن ؟؟؟؟؟؟؟؟؟؟؟؟؟؟!!!!!!!!!
مين...ده كان الحضرى..السد العالى..يعنى ممكن اللى جاى يكون فى نفس نجوميته..ميييييييييييين؟؟؟!!
تريكة.. متعب...وائل جمعة..شادى....مين ..ايه..حسن شحاته أصحى بكرة الاقيه يروح يدرب منتخب تانى !!!!!
